أسعد الله أوقات الجميع بكل خير , ورمضان مبارك علينا وعليكم يا رب , جعلنا الله وأياكم من عتقائه من النار في هذا الشهر الفضيل
انقطعت فترة ليست بالقصيرة , وما أكثر انقطاعاتي في جميع أموري , وإذا كان القائل يقول : [ قليل دائم خير من كثبر منقطع ] فأقول : [ الكثير المنقطع خير من القليل المنقطع بلا شك ] , والمشكلة أن القليل المنقطع هو ما لدي :/
ابدأ بالأسلوب العامي , وبعيد عن الرسمية الزايدة , وأبشركم دخلت عالم الأندرويد القميل :) وفعلاً وجدت نفسي كثيراً في هذا العالم المترامي الأطراف لولا وجود بعض المعضلات البسيطة اللي بلا شك راح أحلها في شراءي لجهاز أندرويد في المرة الجاية .
[ android ] كانت كلمة غريبة عليّ ولو اني كنت أتلذذ بنطقها إلا اني ما اعرف وش تحمل ولا ادري وش بالضبط أصلها , والحين ابشركم عرفت أشياء بسيطة عنها , وبقولها لكم إن شاء الله .
أولاً : ليش أندرويد ؟
أقول لكم الصدق , كنت ناوي أشتري آيفون , إلا ان استخدامي له من خلال صاحبي , ما كان فيه اي شي يحمسني لشراءه , إلا أشياء بسيطة بالإمكان الإستغناء عنها أو تعويضها بأشياء مشابهة [ وجهة نظري وادري ان فيه ناس ودها تفكّ وجهي بجهازي الجديد ] ولمّا عزمت على شراءه أكيد رحت للسوق , إلا انه في السوق تبدّل الحال , مرّيت لي كم محلّ بخصوص إني اشوف ارخص سعر عند محل , وبالصدفة إلا انا شاطف جرير , قلت خلني ادخل واشوف وش الأجهزة اللي يعرضونها , لأني كأني اذكر انهم كانوا يركزون آيفونات هناك , واسأله عن الآيفون , قال: منقطع عندنا , قلت: كفوو , وتطيح عيني على حبيبي جهازي , ويا زين الحب والعشق من أول نظرة , قلت: هذا أندرويد , قال: ايه , طلبت منه اني استخدمه , وما قصّر , بس نصيحة الشيء الجديد مرة مرة عليكم لا تتهورون وتشترونه فجأة , اسألوا ابحثوا , لا تطيحون باللي طحت فيه [نصيحة صغيرة] , المهم ؛ طلعت من عندهم وعلامات الحيرة باينة علي , رجعت اسأل عن الآيفون , ولكن في راسي جهاز ثاني , يعني مشكلة أخون الآيفون وأشتريه وأنا كلها فترة وأشتري عليه جهاز ثاني :* , لكن الحمدلله صارت لي خيرة , ما أمداني أدخل لي محل أو محلين بالكثير , إلا أنا راجع لجرير وقررت اختار الجهاز اللي هو Motorola Milestone .
ثانياً : يا شين الإستعجال !
يمرّ علي اسم أندرويد مثل ما قلت لكم قبل , لكن ما ادري وش بالضبط معناه , ما ادري وش فيه ووش ما فيه , وش يميّزه ووش عيوبه , أفضل جهاز طرح في السوق له , أشياء كثيرة كنت أجهلها , واذكر اني سألت في التويتر , إلا اني ما حصلت إجابة شافية , فحسيت اني لازم أخطو هذي الخطوة واتجرأ واشتري جهاز بهذا النظام وبعدها تتكشف لي الأمور لا محالة , وفعلاً , ولو انها حركتي هذي غبية وأقدر آخذ نصائح ناس منّا ومنّا وابحث في النت , لكن صار اللي صار , وللي ما كان يدري مثلي فالشركات اللي استخدمت هذا النظام وأنا اعرفها لحدّ الآن هي : HTC , LG , Samsung , Sony Ericsson , DELL , Acer , Motorola ويقولون Nokia في الصين طرحت موديلها N8 بنظام الأندرويد .
ثالثاً : وش لقيت ؟
أول شي تفاجأت ان الجهاز ما يشتغل إلا وعندك حساب في Google , يعني اغسل يدك إنك تشغّل الجهاز وانت ما عندك حساب في Google , الشيء الثاني لو تشوفوني وأنا استخدم أول جهاز لي لمس , بتقولون: ((شوي شوي لا ينكسر اصبعك يا الناعم)) ولكن فعلاً النقلة بين الأجهزة “”أم ضغاطات”” إلى أجهزة اللمس تضع الشخص بموقف صعب شوي , ولكن أهم نقطة أحب انبه عليها انتبهوا تشترون جهاز أندرويد ما فيه Market وهذا اللي مبهذلني الحين , واللي يبي جهاز موتورولا للبيع يراسلني , لأني ببيعه واشتري جهاز فيه Market , تقولون وش ذا الماركت , اقول لكم وش هو : هو تطبيق يجي مع النظام أصلاً ويوصلك بمتجر البرامج الرسمي للأندرويد [مثل AppStore في الآيفون] إلا أن الماركت هذا فيه سرّ ما ادري وش هو بالضبط وصاير ممنوع عندنا في السعودية وسمعت انه في الإمارات كذلك ومصر , والسبب !!! ما ادري والله , لكن السالفة شكلها كبيرة :puzzled: , المهم اني حصلت بعد ما شريت جهازي بعض المحلات متوفر عندها أجهزة بداخلها ماركت , وإن شاء الله قريباً التغيير لجهاز يحتوي على الماركت .
رابعاً : عندك سلف برامج ؟
هذي مشكلة اللي ما عندهم ماركت , يروحون يبحثون عن اسم البرنامج في النت بعدين يحملونه على الكمبيوتر وبعدها يرسلونه لجوالاتهم وفيها يكون نسخة جديدة أو قديمة , وبهذلة وحوسة في الإمكان إختصارها بالماركت , وإن شاء الله ناوي احط لي في المدونة هنا كم برنامج اعجبوني , أو أقول البرامج اللي استخدمها في جهازي حالياً .
خامساً : وش أطلق جوال أندرويد ؟
سؤال وجيه , شكراً , راح أذكر أفضل 5 أجهزة وذلك حسب هذا المصدر , يصير في المركز الأول جهاز Samsung Galaxy S والثاني HTC Legend يليهم الثالث جهاز HTC Desire والرابع Dell Streak وأخيراً جهاز HTC Nexus ONE أو كما يسمّونه , جهاز Google المدلل , ولك أن تختار بين هذه الأجهزة ولكن احرص على شركة HTC فبلا شكّ أنّها متزعّمة في نظام الأندرويد .
سادساً : تعطيني دورة ؟
وبما إني اليوم لقيت برنامج يسوي التقاط صورة للشاشة , فأحب اشارككم بعض التطبيقات والخلفيات اللي امتعتني في هذا النظام :)
ابدأ بصور الـ Wallpaper اللي استخدمها وهي تفاعلية مميزة , تتغير على حسب الوقت الحالي لي , فمثلاً الفجر يكون الجو بداية الشروق وبالليل نجوم وظلام ولكم الصورة تشوفون كيف
برنامج القرآن الكريم
إمكانية نشر الصورة عبر برامج متصلة بالشبكات الإجتماعية , مثل التويتر والتمبلر و Gmail ميزة أعجبتني كثيراً
وأخيراً صورة للعبة أعجبتني بدقتها العالية :)
وأخيراً , آمل أن أكون قد أضفت لكم نبذة ولو بسيطة عن هذا النظام وما فيه من أشياء ولو أنها صغيرة , إلا اني ما ابي احد يطيح باللي طحت فيه .
وصياماً مقبولاً وإفطاراً شهيّاً :rose:
